Mga kandidato sa BSKE sa Lapu-Lapu mag-unity walk
CEBU, Philippines — Mga kandidato sa Barangay ug Sangguniang Kabataan elections (BSKE) ang magpahigayon og unity walk ug peace covenant karong Sabado.
Kini gipasiugdahan sa kapolisan sa Lapu-Lapu City Police Office (LCPO) nga gipangulohan ni Police Colonel Elmer Lim, director sa LCPO ug Atty. Anjaneth Lamban, election officer sa maong siyudad.
Si Police Lieutenant Christian Torres, hepe sa City Investigation Detection and Management Unit (CIDMU) ug tigpamaba sa LCPO nagkanayon nga ilang gidapit sa pag-apil ang 1,402 ka kandidato sa BSKE gikan sa 11 ka barangay sa Isla sa Olango ug 19 ka barangay sa mainland sa maong siyudad.
Matud ni Torres nga magsugod ang maong kalihokan pinaagi sa pagpanglakaw sa mga kandidato diha sa kadalanan sayo sa kaadlawon sa maong adlaw nga manukad diha sa city hall ug mosubay kini sa kadalanan sa pagpakita nila ngadto sa mga Oponganon sa ilang panaghiusa alang sa hapsay ug malinawon nga piniliay.
Sa ilang pagbalik sa city hall ilang himuon ang pagpirma sa gihan-ay nilang kasabotan sa kahapsay ug kalinaw nga piniliay o ang pagtamod sa Honest Orderly and Peaceful Election (HOPE). (BANAT NEWS)
- Latest
