Training sa Board of Election Inspectors sugdan na

CEBU, Philippines — Wala'y hunong ang pagpangandam sa Commission on Elections (COMELEC) Region Seven sa nagkaduol nga Barangay ug Sangguniang Kabataan Elections.

Gitug-an ni Atty. Lionel Marco Castillano, Regional Director sa COMELEC-7 nga sugdan karong weekend ang training sa Board of Election Inspectors sa nagkalain-laing munisipalidad ug siyudad.

Ang mga election officers naghimo sab og briefing sa mga modagan sa umaabot nga piniliay kay sila nagtuo nga kun mahibawo ang mga kandidato sa angay ug dili angay buhaton mosunod gyud sila sa balaod ug dili nila i-risgo ang ilang kandidatura pinaagi sa paglapas sa balaud sa COMELEC.

"Definitely, this time the COMELEC will disqualify those who violate our laws", sigon ni Atty. Castillano.

Kadtong dunay ireklamo tungod kay nag premature campaigning mahimong modirekta sa COMELEC Manila sanglit duna sila'y Task Force Epal nga mohimo og preliminary fact finding investigation labot sa maong kalapasan.

Mohimo sab og Oplan Baklas ang COMELEC uban ang laing ahensiya sa gobyerno aron pagtangtang sa mga posters o tarpaulins sa mga modagan sa eleksyon ilabi na kadtong wala sa designated area.

Samtang nagpaabot pa usab ang COMELEC sa Dakbayan sa Talisay sa listahan sa mga magtutudlo nga ihatag sa Department of Education (DEPED) nga moserbisyo sa piniliay sunod buwan.

Kini maoy gibutyag ni April Mae Gamboa-Salagubang, election assistant sa siyudad.

Hinuon ang DEPED nipasalig nga naa sila y igo nga gidaghanon sa magtutudlo nga makatabang sa pagpahigayon sa BSKE.

Asoy pa ni Gamboa-Salagubang nga naabot na ang pipila ka mga supplies nga gamiton sa piniliay ug pangandaman usab karon mao ang pagsalmot nasab sa piniliay sa mga person deprived of liberty kun PDL.

Karong Biyernes, lain nga coordination meeting ang ipahigayon sa comelec uban sa nagkalain-laing ahensya sa gobyerno nga moabag sa piniliay

Sa susamang kalambuan andam na ang Visayas Command (VISCOM) mosuporta sa Commission on Elections (COMELEC) ug Philippine National Police (PNP) alang sa hapsay ug malinawon nga pagpahigayon sa Barangay ug Sangguniang Kabataan Elections sa Probinsiya sa Negros Oriental.

Ang maong pamahayag sa VISCOM migawas human sa pagpahibawo ni COMELEC Chairperson George Garcia nga ang COMELEC En Banc mihukom nga ipadayon ang BSKE sa Negros Oriental karong Oktubre 30, 2023 ug gipaubos ang tibuok Probinsiya sa COMELEC control.

Gitutukan ang Negros Oriental human sa nahitabo mass shooting sa balay ni Governor Roel Degamo diin apil siya sa nakalas sa Lungsod sa Pamplona, Negros Oriental.  — Gabriel C Bonjoc (BANAT NEWS)