PNP masaligong magmalinawon ang BSKE sa Negros Oriental

CEBU, Philippines — Wala'y nakitang rason si Police Lieutenant General Rhodel Sermonia, Philippine National Police Deputy Chief for Administration nga dili magmalinawon ang Barangay ug Sangguniang Kabataan eleksyon sa Probinsiya sa Negros Oriental.

Kahinumdom nga gitutukan ang probinsiya human sa nahitabo masaker niadtong buwan sa Marso diin siyam ang nakalas apil si kanhi Governor Roel Degamo.

Matud ni Sermonia ang mga nalambigit sa maong kasamok napasakaan na og kaso ug ang mga tawo nga gigamit sa paghimo og krimen nadakpan na sab.

"So we don't see any reason na may mga kalokohan na mangyayari diyan at maliban of course sa presensiya ng atong sundalo, sa kapulisan at naging vigilance na rin po ang ating mga kababayan diyan sa Negros Oriental so salamat po sa ating mga kababayan sa Negro Oriental kasi napaka-importante po yung kanilang active participation," asoy ni Sermonia.

Sunod semana magsugod na ang election period sa Barangay ug Sangguniang Kabataan Elections nga mahitabo karong Oktubre 30, 2023.

Si Sermonia miingon nga bag-o lang nahuman ang ilang security conference uban ang Commission on Elections (COMELEC) ingon man partner agencies sama sa Philippine Coast Guard ug Armed Forces of the Philippines sa Camp Crame.

Gitagsa-tagsa nila og tuki ang seguridad sa eleksyon.

"Napaka-importante po ‘yang credible election, walang halong dayaan yan po yun, peaceful para yung mga kandidato natin, yung mga supporters nila ay mabigyan po ng warning na kelangan makiisa sila sa ating pamahalaan at wag po sila maging parte ng kagulohan," sigon ni Sermonia.

Nahisgutan sab nila kun kanus-a mosang-at sa ilang certificate of candidacy ang mga modagan, kanus-a sila pwede mangampanya ug uban pang kalihukan may labot sa umaabot nga Barangay ug Sangguniang Kabataan Elections.

"Kagaya po ng gun ban, kagaya po ng maraming pang provisions gaya ng tinatawag natin na liquor ban yan po ang mga pinag-usapan kung anong araw at kung kelan pa natin i-implement", dugang ni Sermonia. (BANAT NEWS)