Balay naigo sa landslide sa Poblacion Pardo
CEBU, Philippines — Usa ka balay ang gikatahong naapektahan sa pagdahili sa yuta duol Alta Vista Golf Course sa Brgy. Poblacion Pardo sa Cebu City sumala pa sa Cebu City Command Center kagabii.
Atol ning pagsuwat sa balita, miresponde na ang nagkalain-laing emergency responders sa siyudad ngadto sa lugar. Nahitabo kini atol sa kusog nga pagbunok sa uwan kagahapon sa hapon nga niresulta sab sa pagbaha sa downtown area sa dakbayan partikular sa dalan V. Gullas ug sa mga dalan nga daan nang pirmeng bahaon.
Ang baha nakamugna og traffic sa pipila ka mga dagkong karsada sa siyudad ug daghang mga pasahero ang nangatanggong tungod kay dili makalabang sa dalan tungod sa kataas sa baha.
Ang Cebu City milusad og lapad nga operasyon batok sa baha pinaagi sa giumol nga Task Force Gubat sa Baha inabagan sa nagkalain-laing ahensiya sa gobiyerno ilabi na sa Department of Public Works and Highways (DPWH).
Ang task force kasamtangan karong nangusog sa paghawan sa mga sapa pinaagi sa pag-demolis sa mga estraktura sa sud sa 3-meter easement zone sa mga sapa ug paghabwa sa mga basura ug lapok nga nakabara niini. (BANAT NEWS)
- Latest