Comelec Danao dunay skedyul pag-file og COC sa mga barangay

CEBU, Philippines —  Giusab sa Commission on Elections (Comelec) Danao ang venue alang sa pagduso og sertipiko de kandidatora sa mga buot molansar sa barangay ug Sangguniang Kabataan (BSKE) elections karong tuiga.

Segun sa abiso sa Comelec Danao pinaagi sa opisyal nga facebook page sa Danao City Government, ang bag-ong venue adto na sa Danao City Civic Center sugod Agosto 28 hangtud Septembre 2, 2023.

Aron usab nga malikayan nga maghuot sa venue adunay gilatid nga schedule sa matag barangay aron makaduso og certificate of candidacy ang mga buot molansar.

Sa Agosto 28 maoy gikatakda pagfile og COC sa mga molansar sa barangay Baliang, Bayabas, Binaliw, Cabungahan, Cagat-Lamac, Cahumayan ug Cambanay.

Sa Agosto 29 mao ang schedule sa Cambubho, Cogon Cruz, Danasan, Dungga, Dunggoan, Guinacot ug Guinsay.  Samtang sa Agosto 30, ang makafile og COC mao ang mokandidato gikan sa barangay Ibo, Langosig, Lawaan, Licos, Looc, Magtagobtog ug Malapoc.

Sa Agosto 31, ang schedule gitagana alang sa barangay Manlayag, Mantija, Masaba, Maslog, Nangka, Oguis ug Pili.

Sa Septembre 1 mao ang barangay Poblacion, Quisol, Sabang, Sacsac, Sandayong Norte, Sandayong Sur ug Santa Rosa samtang sa September 2 mao ang molansar sa barangay Santican, Sibacan, Suba, Taboc, Taytay, Togonon ug Tuburan Sur.

Samtang sa laing bahin ang Department of Interior and Local Government(DILG) mipagawas og memorandum alang sa pagtangtang sa election propaganda materials subay sa nagsingabot nga SK ug barangay elections.

Ang (COMELEC) mitahas na usab sa Local Government Units, DILG ug ubang ahensya sa gobyerno sa pag-abag sa ilang buhatan sa pagtangtang sa mga unlawful election propaganda materials. (BANAT NEWS)