Lima ka tawo patay sa pag-igo sa bagyong Egay

CEBU, Philippines — Nikabat sa lima ka tawo ang natala nga namatay sa pag-igo sa bagyong Egay, sumala sa National Disaster Risk Reduction and Management Council (NDRRMC).

Base sa inisyal nga report, ang upat ka patay nga lawas naggikan sa probinsya sa Benguet, Cordillera nga biktima sa landslides ug ang usa gikan sa CALABARZON. Samtang gi-confirm pa usab sa NDRRMC ang gitahu nga laing duha ka injured sa CALABARZON ug Western Visayas.

Matud pa sa Philippine Atmospheric, Geophysical and Astronomical Services Administration (PAGASA, ang bagyong Egay nigawas na sa Philippine Area of Responsibility (PAR).

Apan adunay gibantayan nga bag-ong tropical depression ang ahensiya nga posibleng mosulod sa PAR.

Base sa inisyal track sa PAGASA posibling mosulod kini sa PAR sa Sabado sa gabii, Hulyo 29, 2023 hangtod sa Domingo sa buntag Hulyo 30, 2023 apan base usab sa tropical cyclone advisory # 1 nga giisyu sa ahensya dili kini moduol sa kayutaan sa nasud ug mogawas dayon sa Lunes sa hapon Hulyo 31, 2023 hangtud         Martes sa buntag Agosto 1, 2023.

Dugang niini ang NDRRMC mitaho nga mokabat sa 89,639 ka pamilya nga nagpuyo sa 836 ka barangay sa Ilocos Region, Cagayan Valley, Central Luzon, Calabarzon, Mimaropa, Bicol, Western Visayas, Northern Mindanao, Soccsksargen, Bangsamoro Autonomous Region in Muslim Mindanao (BARMM) ug CAR ang naapektuhan sa dautang panahon.

Sa laing bahin gipasiugdahan ni Department of Social Welfare and Development (DSWD) Secretary Rex Gatchalian ang bag-ong disaster preparedness program sa ahensya nga gitawag og Buong Bansa Handa atol sa 2023 Post-SONA Discussion on Environmental Protection and Disaster Management niadtong Miyerkules, Hulyo 26, 2023.

Si Gatchalian nagkanayon nga pinaagi sa bag-ong programa, ang katawhan makabati na sa presensya sa gobyerno atol ug pagkahuman sa usa ka bagyo o usa ka natural nga kalamidad.

Ang Buong Bansa Handa nga programa mo-tap sa duha ka supply chain aron ihatud ang basic food and non-food nga kinahanglanon sa mga biktima sa kalamidad.

Pinaagi usab niini nga sistema ang DSWD makahimo sa pagsiguro nga ang relief efforts o mga relief packs sa gobyerno mokatap sa tibuok nasud. (BANAT NEWS)