Bag-ong police recruits

CEBU, Philippines — Nadungagan ang pwersa sa Police Regional Office(PRO)-7 human nga migradwar ang 299 ka mga bag-ong police nga nakakompleto sa Public Safety Basic Recruit Course (PSBRC) sa Regional Training Center, Camp Jessie M Robredo, diha sa Barangay Jugan, Lungsod sa Consolacion.

Atol sa graduation nahimo nilang guest si Police Major General Madardo Posadas, Director sa National Police Training Institute diin midayeg sa mga bag-ong police nga nisugakod sa training ug nanghinaot sa maayong dagan sa kinabuhi karon nga sugdan na nila ang ilang journey sa PNP organization.  Ang bag-ong graduates gilangkuban sa 63 ka babaye ug 236 ka mga lalake kinsa mosulod sa laing training nga mao ang Field Training Program sulod sa unom ka buwan.

Nisulod sila sa serbisyo niadtong Oktubre 27, 2022 ubos sa class name nga “K.A.D.A.P.I.G” kun “Katawhan Alagaran Dignidad Atong Panalipdan Integridad sa Grupong Kapulisan Ampingan”. 

Gipakita sab sa maong seremonya ang presentation sa certificates of completion ug merit awards sa mga deserving police trainees.

Si Patrolwoman Nimfa Agrabio Gabuya, usa ka BS Criminology graduate nag-top sa klase nga dunay 92.218 percent general average, gisundan ni Patrolwoman Jasmin Joy Dingal, sa 91.761 percent general average, ug Patrolman Joseph Ubay Belarma, nga dunay general average nga 91.728 percent.

Gihatagan sab og leadership awards sila si Patrolwoman Janine Tubog, isip Overall President of the class, ug Patrolman Nielven Vilonta isip Class Battalion Commander. (BANAT NEWS)