Talisay nibalik sa pagpaaktibo sa misting batok sa dengue

CEBU, Philippines —  Gibalik na usab og pagpaaktibo ang misting operation sa Dakbayan sa Talisay alang sa pag-abog sa mga lamok nga nagdala og dengue.

Kini ang gibutyag ni Dr. Lino Alanzado, pangulo sa City Health Office.

Matud ni Alanzado nga gibalik nila ang pag-misting diha sa kabarangayan human sila nakadawat og taho nga adunay mga molupyo nga nagpakita og simtomas sa sakit nga dengue.

Sa buwan sa Abril hangtud sa Hunyo o ikaduhang quarter niining tuiga aduna sila’y natala nga kompirmadong kaso sa dengue sa siyudad.

Gipahinumdoman pagbalik ni Alanzado ang mga barangay health workers (BHW) nga mosuroy na usab diha sa nagkalain-laing sitio aron sa pagpahinumdom sa mga angay nga buhaton aron kalikayan ang dengue.

Ang pagsige og uwan-uwan mao usab ang nakatampo diin adunay mga lugar nga nagpundo ang tubig nga paboritong itlogan sa mga lamok nga nagdala og dengue.

Nunot niini, ang Barangay Dumlog nanglimpiyo na kini sa ilang mga kanal diin daghan ang nagpundo nga tubig. BDB (BANATNEWS)