Bagong Pilipinas campaign gilusad sa president

CEBU, Philippines — Gilusad ni Presidente Ferdinand 'Bongbong' Marcos Jr. ang Bagong Pilipinas campaign isip tatak sa pagdumala ug pagpangulo sa nasudnong kagamhanan ubos sa iyang administrasyon.

Ang ‘Bagong Pilipinas’ nagsilbi nga nag-unang tema sa administrasyon ni Presidente Marcos nga gihulagway nga adunay prinsipyo ug kasaligan nga gobyerno nga gipalig-on sa hiniusang institusyon sa katilingban.

Sa gisugyot nga Memorandum Circular No. 24 nga gilagdaan ni Executive Secretary Lucas Bersamin nahisgutan nga kining kampanya nanawagan alang sa usa ka lawom ug sukaranan nga pagbag-o sa tanang sektor sa katilingban ug gobyerno.

Nagpasiugda usab kini sa pasalig sa gobyerno sa pagkab-ot sa komprehensibo nga reporma sa mga palisiya ug hingpit nga pag-uswag sa ekonomiya.

Giaprobahan na usab ang logo sa Bagong Pilipinas nga gilakip niini nga Circular.

Subay niini ang tanang ahensya sa gobyerno lakip ang GOCCs ug SUCs, kinahanglang mosagop sa ‘Bagong Pilipinas’ nga logo ug ilakip kini sa ilang letterheads, websites, official social media accounts, ug ubang dokumento ug instrumento may kalabotan sa flagship programs sa gobyerno.