Gitangkugo og tigbas, patay

CEBU, Philippines — Away sa yuta sa manag-agaw niresulta sa  pagpanigbas ug kamatayon sa 58-anyos nga lalaki nga giatangan sa dalan alas  6:30 sa gabii niadtong Sabado sa gabii diha sa Sitio Kambaye Barangay Campo 7, Minglanilla.

Ang biktima giila sa kapolisan nga si Regino Dela Torre samtang ang suspek iyaha rang ig-agaw nga senior citizen nga si Mario Dela Torre, 73, nga silingan ra niini sa maong barangay.

Sumala sa imbestigasyun, ang biktima nga si Regino Dela Torre gikan nakig- inom kauban sa iyahang mga higala nga sila Julie Patunog ug Alex Patunog anang gabhiuna ug taud-taud nakahukom ang biktima nga mouli. Ang suspek nga si Mario gikataho nga nagatang daan sa barangay road ug gipaabot ang biktima gikan nag-inom. Sa dihang duol na ang biktima sa nahimutangan niini, gikatahong kalit kini giatake og sundang ug gitigbas ang tangkugo sa biktima.

Dali dayong mibiya ang suspek palayo sa lugar, apan paglabay sa pipila ka oras mitawag sa Minglanilla police ang Toledo Police Station ug gipahibalo nga mitahan diha sa ilang buhatan ang mamumuno.

Ang biktima gihatud sa Minglanilla District Hospital apan gideklarar kini nga patay na human nahiling ni Dr. Jataporn Andre Batanagol.

Ang nakumpiska sa mga imbestigador ang ebidensya nga sundang nga 18 pulgadas ang gitas-on ug gituohang maoy gigamit sa pagpatay. Atol sa gihimong imbestigasyon sa kapolisan, nasuta nga giawayan sa duha ang bahin sa luna ug gituohang mao sab kini ang motibo sa maong krimen.

Ang suspek nga naa sa kustodiya sa kapulisan gipaabot nga pasakaan og kaso karong adlawa ngadto sa korte. — Dannahli Pogado, CNU Intern/IBM (BANAT NEWS)