Kapolisan sa Talisay nag-monitor kabahin sa peke nga kwarta

CEBU, Philippines — Wala pa makadawat og taho ang kapolisan sa Dakbayan sa Talisay kalabot sa mga nanggawas nga peke nga kwarta nga namatikdan diha sa nagkadaiyang dapit sa Sugbo.

Si Police Lieutenant Colonel Randy Caballes, hepe sa kapolisan sa siyudad nibutyag nga sa ilang monitoring wala pa sila makadungog niini sa ilahang siyudad.

Apan wala sila mokompiyansa ug nimando sa iyang intelligence personnel nga palapdan ang ilang monitoring.

Matud ni Caballes nga kadtong mga personalidad nga adunay katakus mohimo sa modus ang ilang gibantayan tungod kay posible og molihok na usab kini. Iyaha sab nga gihangyo ang katawhan nga magmatngon sa klase sa modus.

Giingong daghan og paagi ang mga dautang tawo aron malampos ang ilang modus sama sa paglingaw o paglipat.

Kasagaran sa mabiktima niini kadtong adunay mga tindahan diin sa ilang ka busy malimot na sa pagsusi sa kwarta nga ilang dawaton.

Si Caballes niawhag nga kong mahimo maghinay-hinay lang ug tarongon og susi ang kwarta nga dawaton aron dili mabiktima sa peke nga kwarta nga nanggawas karon. (BANAT NEWS)