Tay-og sa MCWD

Gitangtang ni Cebu City Mayor Mike Rama si Atty. Joey Daluz sa iyang pagka tsirman sa Metro Cebu Water District (MCWD) tungod kay matud pa niya nawagtangan na siya og pagsalig sa abogado.

Hinuon, giklaro sa mayor nga sa iya lang pagka tsirman gitangtang si Daluz. Buot ipasabot magpabiling sakop sa MCWD Board ang abogado.

Apan nagdumili sa pagkanaug isip tsirman sa Board si Daluz tungod kay matud pa sa iyang Facebook post, walay gahom ang mayor sa paghulip kaniya. Iyang giingon nga ang gahom sa mayor kutob lang sa pagtudlo og sakop sa MCWD board ug ang board na maoy mopili og tsirman sama kaniya nga gipili sa iyang mga kauban nga tsirman. 

Daghan ang nagtuo nga politika hinungdan sa  paghulip ni Rama kang Daluz tungod kay posible kini nga maoy moparang kaniya sa pagkamayor sa sunod nga lokal nga piniliay.

Apan lahi ang akong nahibawan sa hunghong sa akong higala nga duwende. Ang duwende miingon nga gihulipan si Daluz ni Mayor Mike tungod kay misupak kini sa laraw sa mayor nga i-privatize ang MCWD. Laraw sa mayor nga ibaligya ngadto sa mga Villar ang MCWD.

Gusto usab ni Daluz nga paabangon ang siyudad sa Prince Warehouse Building nga gipanag-iya sa MCWD nga gihimong satellite office sa City Hall. Apan wala mosugot ang mayor.

Giinsister sa abogado nga bisan gamay lang ang i-abang sa building aron mokita og gamay ang MCWD. Apan wala gihapon mosugot ang Mayor. Ang building giabangan kini sa Prince Warehouse sa kantidad nga P400,000 ang buwan.

Akong gipangutana si Mayor Mike niini sa programang Super Hirit sa DySS Super Radyo Cebu sa GMA 7. Iyang gihimakak nga iyang privatize ang MCWD. Hinuon iyang giangkong nga adunay sugyot niini ang Villar Group apan dili sa pag-privatize sa MCWD.