Duha naangol sa duha ka sunog nga niulbo sa Cebu City

CEBU, Philippines — Nikabat ngadto sa P3.6 milyones ang danyos sa sunog nga niulbo diha sa Sitio Mangga, San Roque, Barangay Mambaling, Dakbayan sa Sugbo kagahapon sa hapon.

Ang kayo sa sunog giingong nagsugod sa panimalay ni Anecita Sapini. Walay gikataho nga nakalas apan naangol si Kyle Villacora, 21-anyos kinsa naglisod sa pagginhawa.  Niabot ngadto sa 50 ka panimalay ang nasunog ug 35 niini ang totally burned ug 15 ang partially burned ug kasagaran sa mga balay gama sa light materials.

Sa laing bahin, niabot sa 13 ka pamilya ang naapektohan sa nahitabong sunog diha sa Sitio Tabuk, Barangay Pit-os, Dakbayan sa Sugbo kagahapon sa buntag. Ang kayo sa maong sunog giingong nagsugod sa panimalay nga gipanag-iya ni Rojie Cruz apan gipuy-an kini ni Emilita Cruz.

Walay gikataho nga nakalas sa maong hitabo apan nangol si Fire Officer 2 Dave Arellano, 35-anyos.

Gikatahong walo ka panimalay ang nasunog diin lima niini ang hingpit nga naugdaw ug gibana-bana nga nikabat ngadto sa P375 mil ang danyos sa maong sunog. Nunot niini, si Mayor Michael Rama niawhag sa iyang mga konsituwente nga kanunay nga magmatngon ug "proactive" aron malikay sa sunog.

Gihangyo ni Rama ang katawhan ilabi na ang ginikanan, mga lider sa kabaranggayan nga ipaniguro nga kanunay nga andam inubanan sa fire extinguishers, tubig , balas alang sa inisyal nga pagpugong sa sunog.

Nasayran nga nagsgunson ang sunog nga nahitabo sa Dakbayan sa Sugbo diin niabot na ngadto sa 42 ang insidente karong buwana. —Sanden J. Anadia (BANAT NEWS)