Reporter nga nag-cover sa Pamplona massacre naaksidente, namatay

CEBU, Philippines —  Babayeng reporter sa Cebu Daily News nga nadasmagan og trak sa Siapo Crossing sa Barangay Tampi, San Jose, Negros Oriental nakabsan gyud sa kinabuhi pipila ka adlaw na samtang giatiman sa mga doktor gikan sa pagka-disgrasya.

Ang nakabsan sa iyang kinabuhi human nadasmagan sa trak sa Siapo crossing, Barangay Tampi, San Jose Negros Oriental, alas 3:10 sa hapon, Domingo, Marso 12, 2023

Base sa report sa Amlan Municipal Police Station, ang reporter nga si  Pegeen Maisie Manlangit Sararaña, residente sa Barangay Tuyom, dakbayan sa Carcar nadasmagan sa trak nga gimaneho ni Nielric Gaso, 27,  niadtong alas -3 sa hapon adlaw nga Domingo, Marso 12,2023.

Sa inisyal nga imbestigasyon, ang biktima sakay og motorsiklo sa iyang uyab nga si Niel Ian Balcobero, samtang ang trak nga gikan sa amihanang direksyon mi-overtake sa laing trak ug nadasmagan ang managuyab sa kilid sa karsada nga nagpaabot makalabang padung sa kasadpan.

Nakaangkon og mga samad sa ulo ang reporter tungod sa kusog nga impact, gidala kini sa Polymedic Hospital apan namatay kini kagahapon sa gabii Marso 13, 2023.

Kahinumduman nga si Sararaña usa sa mga nag-cover sa nahitabong masaker sa Pamplona diin gipatay si Negros Oriental Governor Roel Degamo ug laing walo ka mga tawo.

Si Police Capt.Carlo Desano, Officer In-charge sa San Jose Police Station nga nahinabi sa Banat News nagkanayon nga ang drayber sa trak nakagawas na sa detention cell sukad niadtong Lunes tungod sa pagpupos sa 18 oras nga reglementary period unya wala pay kaso nga gipasaka sa pamilya batok kaniya.

“Na lapaw na siya sa reglamentary period unya March 12 to nahitabo at around 3 (PM) siguro nag lapse siya mga 9:13 in the morning the following day,” si Desano nagkanayon.

Ang lawas ni Sararaña gikatahong ihatod kagahapon (Lunes) sa iyang pinuy-anan sa Purok Buongon sa Tuyom, Carcar City.

Ang Cebu Federation of Beat Journalist (CFBJ) nasubo pag-ayo sa pagtaliwan ni Sararaña.—  IBM (FREEMAN)