Dili na motuong “dunay forever”

CEBU, Philippines — Mitulo ang mga luha sa usa ka 38- anyos nga single mom human siya gibisita sa kapolisan sa Dakbayan sa Talisay diha sa ilang barong-barong sa Barangay Maghaway kagahapon sa buntag.

Nasurpresa si Arsenia Delima sa pag- abot sa grupo ni Police Lt. Col. Randy Caballes, hepe sa kapolisan sa Talisay nga nagdala og bouquet sa buwak nga gitunol kaniya.

Matud pa ni Caballes nga karon sa adlaw sa kasing-kasing mas maayo nga ipaabot ang gugma ngadto sa isig-kaingon ilabi na sa kaparehas ni Delima nga nag-inusarang nibuhi sa siyam ka anak diha sa iyang gamay nga payag-payag. Ang siyam ka mga anak ni Delima gasa gikan sa iyang upat ka naka-relasyon sa iyang kinabuhi.

Wala siya kapugong sa kaugalingon pagsugilon nga sagad sa mga amahan sa iyang mga anak managmal kaniya ug walay mga baruganan sa ilang kaugalingon, mao nga nakadesider siyang biyaan sila ug maginusarang buhion ilang mga anak.

Duha sa iyang mga anak nga nagpangidaron og 24 ug 20 anyos naminyo na. Ang uban naa kaniya ug ang kinamanghoran 2-anyos pa.

Giangkon niya nga mao pa kini ang unang higayon sa tibuok niyang kinabuhi nga gihatagan siya og buwak sa Valentines Day.

Gawas sa buwak, duna kini pakapin nga groceries ug mga gamit sa pag-manikurista nga maoy iyang gibuhi sa mga anak.  “Dili nako motuo sa forever sir. Makauuwaw man akong pagkabutang pero dili lang gyud magpadala sa problema ug adto nalang ibubo ang oras sa pag atiman sa mga bata,” nagkanayon si Delima.

Si Kapitan Edwin Cabatas sa Maghaway miingon nga sila sab sa barangay ang nagtan-aw sa kahimtang ni Delima ug pirme gyud nila kining iapil sa mga kaayohang ihatag para sa ilang mga konstituwente.

Si Christopher, 12 anyos nga anak ni Delima naabtan pa nga nanghugas sa ilang mga plato, mipadayag nga maningkamot siyang makahuman og eskuyla kay gusto siyang motabang sa inahan. (BANATNEWS)