DPWH gihangyo sa pagbutang og barrier sa karsada sa Talisay

CEBU, Philippines — Nihangyo ang konseho sa Dakbayan sa Talisay ngadto sa Department of Public Works and Highways (DPWH) nga kung mahimo mabutangan og barrier ang karsada sa bukirang bahin sa siyudad.

Si konsehal Danny Caballero, chairman sa committee on resiliency niduso og resolusyon nga naghangyo sa DPWH aron matrabaho ang barrier.

Sa nasayran ang Barangay Campo 4 ug Manipis maoy mga barangay sa Talisay diin sagad mahitabo ang aksidente sama sa pagkatagak sa mga sakyanan ngadto sa pang-pang.

Gani ang maong mga lugar gibisita na sa mga sakop sa City of Talisay-Traffic Operation Development Authority (CT-TODA) uban sa pari aron halaran og pag ampo ug pagbendisyon tungod sa pamahayag sa mga tawo nga taw-an o hilan ang maong lugar.

Matud pa ni Caballero nga tuyo nila nga kung aduna may disgrasya nga mahitabo di na molahos sa pang-pang ug mapugngan kini sa barrier.

Hinuon siya nitataw nga ang pagpahinay ug mabinantayon sa pagmaneho maoy usa nga makalikay sa di maayong panghitabo sa karsada.

Si Caballero nanghinaot nga unta matagad o maaksyonan sa nahisgutang ahensya ang ilang hangyo alang sa kaayohan sa mga motorista. (BANATNEWS)