Polis naangol sa gang war kagahpon sa buntag

CEBU, Philippines — Tulo ang naangol sa nahitabong away sa duha ka grupo sa mga batan-on diha sa Mabini Street, Barangay Pari-an, Siyudad sa Sugbo pasado alas 5:00 sa buntag kagahapon.

Matud sa hepe sa Parian Police Station Major Efren Diaz nga ang duha ka grupo nga nalambigit sa pinusilay mao ang Marka Tabla nga gikan sa Barangay T. Padilla, Lorega ug Hipodromo ug grupong Amerson nga gikan sa Barangay Tinago ug Tejero.

Base sa imbestigasyon sa kapolisan nga ang grupong Amerson nag-standby diha sa usa ka convenience store ug niagi ang Marka Tabla nga giingong nakakita nga adunay armas nga gipakita ang Amerson hinungdan nga sila nidagan.

Apan ang Mark Tabla aduna usab sila’y armas hinungdan nga nahitabo ang pagbinayloay og bala sa maong mga grupo nga niresulta sa pagkaigo sa tulo ka biktima diin usa niini usa ka polis nga nadestino sa Consolacion Municipal Police Station.

Ang mga biktima mao sila si Police Executive Master Sergeant(PEMS) Vincent Aguanta, residente sa dapit kinsa igo lang nanglimpiyo sa iyang sakyanan gawas sa ilang panimalay, Donna Blair Banzon  ug Anthony Corro, parehong mga residente sa Barangay Tejero niining siyudad nga padong lang unta mouli gikan sila nitambong sa Misa de Gallo.  Human sa hitabo dali nga nihimo og follow up operation ang Parian Police Station hinungdan nga adunay pipila ka miyembro sa Mark Tabla ang nakustodiya sa kapolisan ug gipangita pa nila ang ubang sakop sa Amerson nga grupo.

“According sa mga witnesses nato lain-laing nga armas nga gigamit nila, naay .22, naay .38. Actually bag-o pa ni sila, mga grupo sa mga tambay nga mga batan-on ba, tapok-tapok lang”, padayag ni Diaz.

Subay sa maong hitabo, si Police Colonel Ireneo Dalogdog, city director sa Cebu City Police Office(CCPO) nagkanayon nga dili sila magduha-duha sa pagpasaka og kaso batok sa maong grupo sa mga batan-on kon mapatud-an nga sila sad-an ilabi na nga adunay nabiktima sa maong insidente.

Kasong alarm and scandal ug frustrated homicide ang ipasaka nga kaso kini aron  maleksiyon ang maong mga grupo sa mga batan-on.

Makig-alayon usab ang kapolisan sa barangay officials aron matultolan ug maadto ang maong mga grupo sa batan-on nga nakamugna og kasamok. —/BDB (BANAT NEWS)