Luna nga gipuy-an sa police officials sa PC Hills bawion sa Kapitolyo
CEBU, Philippines — Gisugdan na sa Probinsya sa Sugbo ang proseso sa pagbawi sa luna nga okupahan sa PC Hills diha sa barangay Apas.
Ang Lot 1157 nga adunay sukod nga 25, 970 metro kwadrado ug katunga sa Lot 1158 nga adunay sukod nga 25, 853 metro kwadrado maoy gusto bawion sa Kapitolyo.
Niadtong 1959 ang Kapitolyo midonar sa maong luna ngadto sa Philippine Constabulary (PC) aron headquarters ug barracks niini. Apan human nga na dissolve ang PC ug nawala na pud ang headquarters niini, ang Kapitolyo gustong mabawi na ang maong luna nga karon kasamtangang gihimong living quarters sa mga opisyales sa kapolisan sa rehiyon.
Si Gobernador Gwendolyn Garcia gusto nga mosulod ang Kapitolyo ug ang kapulisan og Memorandum of Agreement alang sa maong katuyoan.
“I don’t want to cause too much anguish. Sa akin lang the Province also has to be justly compensated for the lot. You cannot get the lot for free but it’s of no moment because you will be dealing with the National Housing Authority (NHA), with PAG-IBIG where they have very- very liberal terms in repayment where it will be NHA and PAG-IBIG that will pay the Province of Cebu,” matud ni Garcia atol iyang tigom uban sa PRO-7 director Roque Eduardo Vega, legal officer sa PRO-7 ug Capitol Legal Officer Donato Villa.
Ang Kapitolyo padayon karon pagbawi sa mga luna nga gipanag-iya niini. Bag-o pa lang na-recover sa probinsya ang 16 ka tituladong luna sa AFP-CentCom sa Barangay Apas dakbayan sa Sugbo.— IBM (BANATNEWS)
- Latest
