Nag-team building nalumos sa resort sa Minglanilla
CEBU, Philippines — Patay ang usa ka lalaki human kini nalumos sa usa ka resort sa Barangay Tungkil, lungsod sa Minglanilla niadtong Miyerkules sa alas 3:30 sa hapon.
Ang nalumos nailhan nga si Claire Remocaldo, 20, taga Bolinawan, Syudad sa Carcar. Sa inisyal nga imbestigasyon sa kapulisan nasuta nga nitambong og team building ang batan-on.
Sa iyang pagkaligo napunta kini sa lawom nga bahin sa swimming pool apan dili kamao molangoy hinungdan sa iyang pagkapa-kapa. Ang uban sab nga nangaligo wala makabantay kaniya hangtud nga siya nalumos.
Gisuwayan sa pagtabang ang biktima ug gidala sa Minglanilla District Hospital apan nakabsan gyud kini sa kinabuhi.
Tungod sa maong hitabo, gisuspenso ni Minglanilla Mayor Rajiv Enad ang operasyon sa Circa LaPlaya Resort ug gimandoan pasumitihon og eksplinasyon kalabot sa pagkalumos sa batan-on. Si Enad mipadangat sa iyang pahasubo sa pamilya sa biktima ug nisaad nga mahatagan og hustisya ang kamatayon ni Remocaldo.
“It is high time we promote the municipality not only as a fun tourist destination but also as a safe tourist destination,” matud ni Enad sa iyang Facebook page.
Usa ka ocular inspection ang gikatakdang himuon sa dapit ug dunay mga rekomendasyong kinahanglang sundon sa management alang sa luwas nga operasyon niini. —IBM (BANATNEWS)
- Latest
