City Central School nagsugod na sa face-to-face classes

CEBU, Philippines — Ang mga tunghaan sa Siyudad sa Sugbo usa na niini ang City Central School nga nahimutang sa tunga-tunga nga bahin sa Cebu City ang wala magamit sulod sa sobra sa duha ka tuig gumikan kay gihimo kining Barangay Isolation Facility alang sa mga nataptan sa COVID-19.

Ang kagamhanan sa Dakbayan sa Sugbo nibalik og turnover sa maong mga eskwelahan ngadto sa Department of Education Cebu City Division tungod kay gigamit kini sa nilabay’ng eleksiyon ug sa pagpahigayon sa limited face to face classes nga gisugdan sa niaging adlaw’ng Lunes.

Gikan sa kinder hangtud sa grade 6 adunay usa ka section nga giablihan nga gitambongan sa napulo ka tinun-an nga mga fully vaccinated.

Usa ka tinun-an sa kinder nakita nga sa wala pa kini mosulod sa classroom niagi una kini sa hand washing area ug sa temperature check.

Ang principal sa City Central School Maricon Gumba nagkanayon nga aron masiguro nga luwas ang ilahang mga tinun-an ilabi na nga wala pa mahuman ang pandemiya sa dili pa mosulod sa classroom hatagan sila og laing facemask ug inig gawas hubuon ang gigamit nga facemask ug hatagan og bag-o.

Nunot niini, posibleng karong tuiga adunay mahitabong physical graduation sa mga graduating students sa grade 6 ug 12 matud ni Lauronilla.

Ang Siyudad sa Sugbo pabilin nga ubos sa alert level 1 sa quarantine status ug padayon usab nga niubos ang kaso sa COVID-19.

Matud ni Dr. Liverato Lauronilla, DepEd Cebu City District Supervisor nga gi-update na ang mga principal sa mga tunghaan ug nagpahigayon na usab siya og meeting kalabot sa physical graduation.

Ug gipahinay-hinay na og andam ang mga magtutudlo ug principal sa mga tunghaan sa pag-monitor sa mga vaccinated nga mga bata nga mo graduate ilabi na sa grade 6 ug grade 12.

Si Lauronilla nagkanayon nga gikinahanglan ang vaccination card, parent’s permit, suporta sa ginikanan sa graduating student, minutes sa meeting ingon man ang suporta sa barangay tungod kay mao kini ang ilahang i-support sa application for graduation nga i-sumetir ngadto kang DepEd Cebu City Division Superintendent Dr. Rhea Mar Angtud alang sa approval. —Rowena D. Capistrano/BDB (BANATNEWS)