Wa ka ‘move on’ kanhi uyab giluba

Cebu, Philippines — Usa ka dalaga ang nalandig sa tambalanan samtang nagtaroy pa ang kutsilyo diha sa iyang buko-buko human kini giingong gidunggab sa iyang kanhi karelasyon nga wala maka ‘move on’ sa pagbuwag nilang duha.

Nahitabo kini diha sa may Magsaysay Hills, Barangay Poblacion Toledo City niadtong Lunes sa gabii. Ang biktima tagoon lang sa pangalan nga Marimar, 25, dunay kapuyo ug residente sa maong lugar. Samtang ang suspetsado tagoon lang sa pangalan Lucky, 33, minyo ug silingan sa biktima.

Base sa inisyal nga imbestigasyon sa kapulisan giingong ang biktima naglakaw padulong sa usa ka tindahan aron mopalit og pagkaon.

Apan wala makapalit ang biktima kay kalit niabot ang suspek ug diretso niining gidunggab ang bukobuko sa dalaga.

Ang biktima misuway sa pagsukol aron depensahan ang kaugalingon apan giusban siya pagdunggab niini makadaghang higayon diha sa walang kamot,ug sa  bukobuko diin miungot ang kutsilyo. Dali nga gidala  sa iyang igsuon ang biktima sa Toledo City General Hospital una kini gibalhin sa Dakbayan sa Sugbo.

Atol sa gipahigayon nga hot pursuit operation nasikop ang suspetsado ug gipaslak na sa prisohan.

Base sa pamahayag sa pipila ka silingan sa maong lugar giingong wala makadawat ang lalaki nga gibuwagan kini sa giingong iyang kanhi hinigugma.—Rowena D. Capistrano (BANAT NEWS)