244 kaso nadugang sa CV
CEBU, Philippines — Dugang 127 ka mga COVID-19 nga pasyente ang natala sa Central Visayas base sa gipagawas nga resulta sa mga laboratory test sa Department of Health niadtong Hulyo 17, 2020.
Samtang 244 ka mga kaso sab ang nadugang gikan sa 1, 800 ka laboratory results nga nigawas.
Sa report sa Department of Health (DOH-7), 127 sa mga bag-ong kaso na-record gikan sa Cebu City, 20 sa Mandaue, 20 sa Lapu-Lapu, 64 sa Probinsya sa Sugbo ug 13 sa Lalawigan sa Bohol.
Kini ang hinungdan nga miabot na og 13, 172 ang total confirmed cases sa covid-19 sa Central Visayas. Ang 6, 625 niini ang active cases; 5, 897 ang naka-recover ug 650 namatay.
Sa mga active cases 2, 558 ang na-admit ug 4, 067 ang anaa sa isolation facilities.
Mandaue City
Sa Mandaue City, tulo sa 28 ka mga polis sa Mandaue City Police Office (MCPO) nga nataptan sa virus ang nangaayo na.
Ang tulo gikan sa Presinto 5 ang hingpit na nga naka-recover sa maong sakit sa miaging semana.
Si Police Colonel Jonathan Abella nga maoy direktor sa MCPO miingon nga ang mga nangaayo papahuwayon una og usa ka semana una pa pabalikon sa trabaho.
Dugang pa ni Abella nga ang nahibiling 25 nga positive personnel sa MCPO, ang 20 niini kanila ang anaa sa isolation center sa Police Regional Office in Central Visayas (PRO-7), ang laing duha anaa pa sa hospital samtang laing tulo kanila ang nagpaubos sa isolation sa ilang panimalay.
Daghang naayo
Samtang sa Dakbayan sa Talisay hinayhinay nga nagkadaghan ang nangaayo kada adlaw kun itandi sa mga bag-ong nangatakboyan sa virus nga gikalipay ni Mayor Gerald Anthony “Samsam” Gullas Jr.. Karong bag-o, 10 ka tawo ang bag-ong nagpositibo apan 43 sab ang nakarekuber.
Si Gullas nagkanayon nga naglaom gyud siya alang sa kaayohan sa katawhan apan nangandam lang sab sa grabe pa sab nga panghitabo.
“Actually starting today, it is the first time from the start of this pandemic where our recoveries kay mas daghan na sa atong active cases,” matud pa ni Gullas.
Sud sa 43 nga nakarekuber na, 18 niini ang regular nga pasyente samtang 25 ang gikan sa Talisay City Jail. Romeo T. Limpangog ug Le Phyllis F. Antojado/IBM (BANATNEWS)
- Latest
