Northern Cebu signal no. 1

CEBU, Philippines — Gi-monitor sa mga local disaster offices sa pipila ka lungsod sa amihanang bahin sa Lalawigan sa Sugbo human pipila ka lungsod ang gipaubos sa Tropical Cyclone Wind Signal No. 1 tungod sa Bagyong Ambo.

Si Wilson Ramos sa Provincial Disaster Risk Reduction and Management Office nagkanayon nga naghatag na sila og advisory sa mga LDRRM teams sa mag lungsod Medellin, Daanbantayan ug Isla sa Bantayan.

“If ever kinahanglan, naay force evacuation, andam na sila didto, kinahanglan lang gihapon mo-observe og social distancing,” matud ni Ramos.

Si Daanbantayan Mayor Sun Shimura nagkanayon nga nangandam usab ang mga barangay sa lungsod pinaagi sa purok system ug gitutukan ang baybayon.

Ang mga tunghaan nga wala gigamit isip Barangay Isolation Center maoy himoong evacuation center kun adunay pagpabakwit nga mahitabo.

Kagahapon sa buntag nagsugod ang pag-ulan nga nasinati sa lungsod apan nilinaw ra usab ang panahon sa kahaponon.

Samtang pipila ka barko wala na tugoti nga makalawig tungod sa Bagyong Ambo.

Matud ni Lt. Junior Grade Eric Salcedo sa Cebu Coast Guard Station nga temporaryong gisuspenso ang biyahe sa mga barko sugod niadtong Miyerkules padulong sa Northern Samar ug amihanang bahin sa Eastern Samar.

Ang mga biyahe sa Northern Cebu padulong sa Calbayog, Leyte ang wala na sab gipabiyahe.

Kanselado sab ang mga biyahe gikan sa Dakbayan sa Mandaue padulong sa Hindang, Leyte ug Iloilo. Rowena D. Capistrano/GMR (BANATNEWS)