Merkado sa Tabunok sirado sa adlaw’ng Domingo

CEBU, Philippines — Ang mga residente sa Dakbayan sa Talisay dili na kini makaadto sa merkado sa Tabunok ug sa ubang mga merkado sa siyudad sa adlaw nga Domingo.

Sa adlaw nga Domingo ang mga residente sa siyudad papundohon kini sa ilang mga panimalay tungod kay sa maong adlaw siradohan ang merkado sa Tabunok ug uban pang merkado sa siyudad tungod kay ang maong sa adlaw gitagana sa pag-disinfect sa merkado.

Si Mayor Gerald Anthony “Samsam” Gullas Jr. niluwat sa Executive Order No. 21 sa pagdeklarar sa adlaw nga Domingo nga magpundo lang sa ilang panimalay ang mga residente.

Kini human nga nagkaanam og kadaghan ang mga Talisaynon nga nagpositibo sa covid-19.

Niining ulahi lang, niabot na sa unom ang kaso sa covid-19 sa siyudad.

Matud ni Gullas nga mao kini ang schedule sa ilang pag-disinfect sa matag semana hinungdan nga ang katawhan wala na kini rason sa paggawas sa ilang pinuy-anan atol sa nahisgutang adlaw.

Ang matag barangay mopatuman niini inubanan sa mga barangay tanod pagsiguro nga hipos gyud ang tanan dihia sa ilang pinuy-anan.

Nunot niini, sa post ni Gullas sa iyang facebook page lakip ang mga supermarket ug groceries sirado sa maong adlaw diin ang kagamhanan sa siyudad mopahigayon usab og massive disinfection sa kadalanan ug mga publikong lugar.

Ang tugotan lang nga moabli sa matag adlaw nga Domingo mao ang mga frontline nga mga buhatan sa gobiyerno sa siyudad ug barangay level, polis ug ubang uniform services, pharmacy, medical clinics, hospitals, manufacturing ug industrial business establishments, energy related entities (fuel and petroleum), bakery, water refilling stations ug mamaligyaay og lechon apan kutob lang kini sa udto. /BDB (BANATNEWS)