Kapitolyo bukas alang sa kaugmaran sa Larsian

CEBU, Philippines — Ang kagamhanan sa Probinsiya sa Sugbo nagplano nga ipa-develop ang luna nga gitukoran karon sa Larsian Barbeque diha sa Fuente Rotunda, Dakbayan sa Sugbo.

Sama sa ubang kabtangan sa Kapitolyo ang Larsian o luna nga gitukoran niini gipaabot nga mosaka usab ang value.

Matud ni Gobernador Gwendolyn Garcia nga bukas ang Kapitolyo alang sa mga developer nga interesadong mosulod og kasabotan tali sa probinsiya alang sa Build-Operate-Transfer (BOT) scheme.

“Larsian, we are now looking at, again increasing the value of the property without disposing, without selling because, the BTO scheme contemplates the improvements to be constructed in that property by the developer which upon completion is immediately turned over to the province”, matud ni Garcia.

Gawas sa BOT scheme, ang developer mo abang usab kini sa maong property nga i-develop niini ug ang probinsiya makakuha og porsyento gikan sa gross revenue sa kompaniya.

Giklaro ni Garcia nga dili magbuot ang Kapitolyo sa development nga himuon kon ipadayon ba ang Larsian nga usa ka pagkaonan o lahi na ang ibutang sa luna. /BDB (BANATNEWS)