MyBus nipahigayon og kaugalingong imbestigasyon
CEBU, Philippines — Ang kadagkoan sa MyBus nangayo og pasaylo kang Mayor Gerald Anthony “Samsam” Gullas Jr. sa Siyudad sa Talisay human ang usa nila ka unit nakahatag og kahasol ug peligro ngadto sa ubang motorista niadtong niaging mga semana.
Si Dennise Trajano, presidente sa Metro Rapid Transit Service Inc. nisuwat ngadto kang Gullas human nahitabo ang pagpasad sa gasolina sa ilang unit diha sa Cebu South Coastal Road (CSCR) nga maoy hinungdan sa pagkalamba sa pipila ka mga motorsiklo niadtong higayona.
Sa ilang suwat ilang giangkon ang maong kalapasan ug nipahigayon usab sila og kaugalingong imbestigasyon sa hitabo.
Giingong lakip usab nila nga gipaubos sa imbistigasyon ang ilang drayber diin wala dayon kini nihunong dihang nakita na niya nga niagas na ang gasolina sa bus nga iyang gimaneho.
Si Gullas nipasaylo kini sa MyBus ug nanghinaot nga dili na mausab ang maong hitabo.
Si Jonathan Tumulak, hepe sa City of Talisay-Traffic Operation and Development Authority (CT-TODA) nitataw nga mahimo na nga kuhaon ang bus nga ilang na-impound kong nabayaran na sa kompaniya ang multa niini nga P5 mil base sa nakalatid sa balaod sa karsada. /BDB (BANATNEWS)
- Latest
