Babaye nadakpan sa drug raid

CEBU, Philippines — Usa ka 38-anyos nga babaye ang nasikop sa mga tinugyanan sa Labangon Police  Station sa Sitio Bliss, Barangay Labangon ning Dakbayan sa Sugbo Domingo sa hapon.

Ang nasikop naila nga si Lavenia Baldesamo, walay trabaho, residente sa Sitio Mahayahay, Barangay Calamba.

Ang Station Drug Enforcement Unit sa Labangon Police Station nipahigayon sa maong buy bust operation batok kaniya  ug nasakmitan kini og 75 gramos nga gidudahang shabu mobalor og P510 mil  base sa Dangerous Drug Board Value ug buy bust money.

Samtang usa ka high value target (HVT) sa kampanya batok illegal nga drugas ug iyang umagad ang nadakpan sa gihimong buy bust operation didto sa Sitio Kilawan, Barangay Tanke, Dakbayan sa Talisay niadtong Domingo sa buntag.

Ang mga dinakpan mao si Lomax Inoc Labajo, 37, ug si Helrico Dela Cruz Patalan, 18, pulos nagpuyo sa maong dapit.  Si Labajo mao ang subject sa operasyon gumikan sa iyang pagkalista niya sa Cebu Provincial Police Office (CPPO) nga HVT.

Ang mga operatiba sa Provincial Intelligence Branch (PIB) pinangulohan ni Police Lieutenant Colonel Marlu Conag nihimo og transaksyon ni Labajo hangtud nga nagpositibo kini ug kini nasikop.

Nakuhaan sila og ilegal nga drugas nga nitimbang 15 gramos nga adunay bana-bana nga kantidad nga P102 mil.

Samtang nadakpan sa mga sakop sa City  Drug Enforcement Unit (CDEU)  ug City  Intelligence  Branch  (CIB)  sa Lapu-Lapu  City  Police  Office (LLCPO)  ang duha ka gidudahang mga drug pushers nga giilang sila si si Randy  Oclaret  Gomez, 22, ug   Rodel Apduhan Pagobo,34. Si Gomez nadakpan alas 2  pasado ang takna  sa miaging kaadlawon sa Sitio Villa Verna sa Barangay  Marigondon sa maong  dakbayan. Samtang sa Sitio Agus Gamay sa Barangay Agus nadakpan si Pagobo.

Si Pagobo naapil  sa listahan sa mga street level pushers ug siya nakuhaan og 12 ka gagmay nga paketeng gidudahang shabu. IBM (BANATNEWS)