TREAT gipaubos pag-usab og pagbansay

CEBU, Philippines — Gipaubos pag-usab sa pagpabansay ang mga sakop sa Talisay Rescue Emergency Action Team (TREAT) aron mahimong mas epektibo ang ilang paghatag og serbisyo.

Si Alvin Santillana, pangulo sa City Disaster Risk Reduction and Management Office (CDRRMO) nibutyag nga ubos sa programa ni Mayor Gerald Anthony “Samsam” Gullas, Jr. ang ilang gihimo ilabi na nga buot niini nga kahatagan dayon og aksiyon ang mga nanginahanglan.

Ang nahisgutang pagbansay nga gitawag og Emergency Medical Response sulod kini sa 20 ka adlaw ug ang mga bag-o ug karaan nga kawani ang niapil niini.

Matud ni Santillana nga ang maong pagbansay gilangkuban sa physical ug mental ug pagluwas og kinabuhi sa mga tawo nga makasugat og disgrasya diha sa kadalanan.

Tinguha nila nga ma-professionalize ang EMS sa ilang buhatan tungod kay kinabuhi ang ilang luwason sa ilang matag alarma.

Matud usab ni Santillana nga tudloan ang iyang mga sakop sa ambulance management ug pre-hospital care.

Gibutyag ni Santillana nga sa pagkakaron 18 kabuok lang ang personnel sa TREAT diin ang tanan niapil sa pagbansay.

Naglaom si Santillana nga unta maabot ngadto sa 35 kabuok ang ilang personnel aron daghan sila nga magpuli-puli sa ilang duty.

Apan dili usab siya makakuha dayon og personnel tungod kay ang iyang gipangita mao man kadtong adunay “Heart, Interest ug Volunteerism”. (/BDB)(BANATNEWS)