Hotel construction gipahunong
CEBU, Philippines – Laing konstruksiyon ang gipahunong sa Cebu City Office of the Building Official kagahapon human dunay mga liki nga nakita sa karsada duol sa excavation works sa maong proyekto.
Kagahapon si Architect Florante Catalan, pangulo sa OBO, nipagawas og usa ka cease and desist order batok sa 13 ka andana nga hotel nga adunay mga pasilidad sa komersiyal sa Barangay Capitol Site hangtud mahuman ang pag-rectify sa problema.
Ang maong konstruksiyon anaa sa Don Gil Garcia corner J. Llorente Streets.
“Among nakita didto is cracks along Don Gil Garcia Street and gamay on J. Llorente Street. Naa na diay incident report ang Phil Macro Development Corporation nga nakita nila ang cracks that started on July 22 early in the morning,” sigun ni Catalan.
Matud ni Catalan nga adunay building permit ug excavation permit ang Amber Corporation sa maong proyekto.
Sa incident report sa Phil Macro Development Corp., giingong nagsugod ang mga liki niadtong Hulyo 22 sa sayong buntag ug gibanabana nga 5-millimeters ang gibag-on ug 15-meters ang gitas-on sa liki.
Matud ni Catalan nga nag-backfill na ang kontraktor ug gi-cordon na ang lugar aron malikayan ang dugang kadaut sa lugar.
Sigun niya nga ang ongoing construction adunay approved building permit nga giisyu niadtong Hunyo 19, 2019 ug approved excavation permit nga giisyu niadtong Mayo 10, 2019.
Dugang ni Catalan nga ang PDMC o ang kontraktor naghimo og soil nailing or soil protection nga 13-meters ang gilawmon sa drainage culver sa maong lugar.
Kahinumduman nga ikaduha na kining higayon nga nagpahunong ang OBO og excavation works.
Ang unang higayon kadtong sa Gorordo Avenue nga 26-storey condominium project nga ang excavation works maoy hinungdan sa pagkalumpag sa bahin sa Juana Building. (/GMR)(BANAT NEWS)
- Latest
