City Hall mohatag clearance sa police station sa Inayawan

CEBU, Philippines — Girekomendar sa Cebu City Legal Office sa mga hingtungdang departamento sa City Hall nga mag-isyu sa mga kinahanglanon nga permits alang sa Philippine National Police sa pagtukod sa police station sa Barangay Inayawan.

Matud ni Atty. Rey Gealon nga ang mando ni Mayor Edgardo Labella nga patukuran og police station ang maong barangay.

“Police visibility in the area is indispensable, hence the need for the immediate construction of a decent and respectable police station,” sigun ni Gealon.

Nakadawat ang City Legal Office og hangyo alang sa legal nga opinyon sa aplikasyon alang sa local clearance bahin sa gisugyot nga pagtukod sa usa ka three-story police station sa Barangay Inayawan.

Gipasabot ni Gealon nga ang kontraktor sa PNP nga mao ang DSJP Construction wala makakuha sa clearance sa barangay. Sa iyang legal nga report, giingon ni Gealon nga dili mahimong  iproseso sa City Planning and Development Office ang local clearance alang sa pagtukod sa police station tungod kay wala’y clearance sa barangay.

Niadtong 2017, ang Barangay Inayawan nidonar og 566-square meter lot sa Cebu City Police Office alang sa pagtukod sa police station.

Ang barangay nagpagawas og resolusyon nga nagpamatuod sa pagdonar ug gihimo ang usa ka Deed of Absolute Donation.

Sa iyang bahin, si Inayawan Barangay Kapitan Kirk Bryan Repollo niingon nga nagpadala siya og usa ka komunikasyon ni Labella nga nag-ingon nga gusto niya makigkita sa mayor ug hisgutan kini.

“I am just hoping that before any parties will make a move on the foregoing matter, we could sit and talk things over. Hoping that this issue will come to a conclusion with a win-win solution setting politics aside,” sigun ni Repollo. Apan giingon ni Gealon nga ang pagpagawas sa barangay clearance gahum sa barangay subay sa Local Government Code.

“For failure of Barangay Inayawan to act on the request of DSJP Construction within seven days notwithstanding that the applicant is willing and able to pay reasonable fees therefor, the last clause of Section 152(c) becomes operative and the City of Cebu may issue the said license or permit applied for by DSJP Construction without the barangay clearance,” dugang ni Gealon. (/GMR)(BANATNEWS)