Manholes sa Mandaue pasirad-an
CEBU, Philippines – Mosang-at og resulosyon si Konsehal Malcolm Sanchez sa Sangguniang Panlungsod sa Dakbayan sa Mandaue aron awhagon ang mga sakop niini nga manduan ang hingtungdang mga ahensiya nga sirad-an ang mga abli nga drainage ug culvert palibot sa siyudad.
Sa maong resolusyon, giawhag ni Sanchez ang General Services Department, City Engineer’s Office ug ang 27 ka mga barangay sa Mandaue sa pagtaho sa mga abli nga manholes aron malikayan ang panghitabo sa Cebu City diin adunay bata ang napasok sa culvert ug gianod sa baha.
“Though Cebu City to nga incident I don’t want that to happen here in Mandaue, most specially karon nga ting-uwan, daghan bata magduwa ug dili nato matag-an nga naay mga open culverts. Atleast naa tay action diri sa Mandaue City”, matud pa ni Sanchez.
Human sa pag-aprobar sa maong resolusyon, ipasa na dayon kini ngadto sa mga buhatan nga hingtungdan aron daling mapasirad-an ang mga abli nga agianan sa tubig. Matud usab ni Konsehal Nerissa Soon-Ruiz, uso usab ang dengue karon ilabi na gikan sa buwan sa Hulyo hangtod Agosto kay ting-uwan ug usa sa mga breeding grounds sa mga lamok ang culverts ug manholes.
Nakita nila nga daghan ang mapugngan nga bati nga mga panghitabo pinaagi unya sa maong resolusyon. (/DILT)(BANAT NEWS)
- Latest
