Call center agent naghikog; menor nisuway og hikog

CEBU, Philippines – Usa ka call center agent ang diha sa Sitio Omega, Barangay Pahina-Central, Dakbayan sa Sugbo niadtong Martes sa hapon.

Gikatahong nag-unay og higot sa iyang liog gamit ang extension wire si Jesse Redelosa, 27-anyos, residente sa maong dapit.

Ang kapuyo ni Redelosa nga si Renelyn Estaniel, 27, uban sa inahan niini ang nakadiskubre nga nagbitay na kini diha sa sulod sa ilang balay diin ang liog dunay higot nga extension wire ug ang pikas tumoy gihigot diha sa sagbayan.

Sa imbestigasyon sa kapolisan sa Carbon Police Station giingong si Redelosa usa ka drug dependent ug kasagarang awayan niini sa iyang kapuyo mao ang selos.

Giingong si Etaniel kinsa nagpa-checkup sa doktor sa ilang anak nakadawat og text message gikan kang Redelosa nga nagkanayong ipadala nalang siya sa morgue human sa iyang paghikog.

Sa laing bahin, naluwas  sa kapolisan ang 16-anyos nga tinun-an sa Grade 11 nga taga Dakbayan sa Lapu-Lapu dihang nipatong na kini sa railing sa Mactan-Mandaue Bridge habig sa Barangay Looc, Dakbayan sa Mandaue niadtong Martes sa gabii.

Si Police Major Mercy Villaro sa Mandaue City Police Office (MCPO) nibutyag nga ang kapolisan sa Presinto 5 maoy nakadawat sa maong alarma ug kauban sa mga classmate sa menor niadto kini sa nahisgotang lugar.

Nasuta sa kapolisan nga problema sa pamilya ang hinungdan sa pagsuway og layat sa menor diha sa tulay. (Romeo T. Limpangog/BDB)(BANAT NEWS)