Nanghatag og tubig gipang-harass

CEBU, Philippines – Ang kadagkuan sa Metropolitan Cebu Water District ug si Konsehal Dave Tumulak mihangyo sa mga konsumidor nga lugwayan ang ilang pasensiya niining adunay problema sa suplay sa tubig.

Ang MCWD nakadawat og taho nga adunay mga residente nga nang-haras ug nanghulga sa mga volunteers nga nangrasyon og tubig gamit ang firetrucks ug water trucks, rason nga adunay uban nga dili nalang motabang sa paghatod og tubig, nga maoy nakapalisod na hinuon sa paghatod og tubig ngadto sa mga lugar nga walay suplay.

Ang MCWD ug si Tumulak nanghangyo karon sa mga konsumidor og kooperasyon ug pagsabot ingon man nga dili i-harass ang mga volunteers.

Giingong nahitabo ang mga harassments sa may dalan A. Lopez, Alaska, Mambaling, Capitol Site, Sambag 2, Calamba, Punta Princesa ug uban pa.

Sigon ni Tumulak, halos matag adlaw adunay taho sa harassment sa maong dapit hinungdan nga nangahadlok ang mga fire volunteers.

Ang konsehal miingon nga angayan nga magpabiling kalma ang mga konsumidor ug respetuhon ang mga volunteers sanglit igo lang silang nanghatag og tubig ug walay bayad gikan sa gobyerno.

Si Tumulak midugang nga ang publiko angayan modayeg sa gihimo sa mga volunteers sanglit mitabang sila sa kagamhanan ngadto sa mga dapit nga nakasinati og water shortage.

Miawhag sab si Tumulak ngadto sa MCWD nga moabang og water tankers aron i-augment sa city ug barangay-owned firetrucks sa pag-distribute og tubig.

Sigon niini, sagad sa mga deployed firetrucks gikan sa city government ug gamay lang ang sa MCWD. (Rowena D. Capistrano/DILT)(BANAT NEWS)