Garma: Ang checkpoints alang kini sa seguridad

CEBU, Philippines – Giklaro sa direktor sa Cebu City Police Office (CCPO) Police Colonel Royina Garma nga walay dautan kong magpahigayon sila og checkpoints ug wala usab sila magpagamit sa politika.

Gipasabot ni Garma nga ang pagpahigayon og checkpoints random ang pagpili niini og lugar ug alang  kini sa safety sa Dakbayan sa Sugbo.

“Checkpoints are done to make sure safe ang Cebu City, ang daming murder na gamit ang loose firearms and one way is checkpoint. What’s wrong with checkpoints? Are you not happy?” matud ni Garma.

Matud usab ni Garma nga alang kini sa pagsiguro nga hapsay ug malinawon ang pagpahigayon sa May 13, midterm elections ug apil kini sa ilang security preparations kontra sa mga loose firearms ug uban pang kalihukan nga ilegal.

Mahinumduman nga namasangil si Cebu City Mayor Tomas Osmeña nga adunay mga polis nga mag-checkpoint duol sa ilang balay ug natahap siya nga nag-surveillance ang maong mga polis.

Si Garma nihimakak sa maong pasangil ni Osmeña ug nagkanayon nga trabaho lang ang ilang gibuhat.

“Isip namin malinis, ours is simply work, If that is his perception then it is up to him”, ni Garma pa.

Nunot niini, nikabat na ngadto sa 1,472 ang nakompiska nga loose firearm sa gipahigayong Oplan Katok sa CCPO diin ang mga polis tagsa-tagsa nga nibisita sa mga balay sa mga naghupot og armas nga narehistro kaniadto ug na-expired na ang rehistro.

Apil sa mga gibisita sa kapolisan ang mga opisyal sa gobiyerno.

Matud usab ni Garma nga dili pamolitika ang ilang gipahigayon nga kalihukan ang tumong niini mao ang pagmentenar sa kalinaw ug seguridad.

Sa Oplan Katok pahibaw-on ang tag-iya sa armas nga expired na ang iyang lisensiya ug kinahanglan kining isurender sa labing duol nga police station. (/BDB)(BANAT NEWS)