Siyam ka LGU sa probinsiya nideklara og state of calamity

CEBU, Philippines – Siyam na ka local government unit sa Probinsiya sa Sugbo ang nideklara og state of calamity tungod sa huwaw.

Ang maong mga LGU gilangkuban sa mga lungsod sa Ginatilan, Minglanilla, Samboan, Sogod, Tudela, Dumanjug ug mga dakbayan sa Talisay, Carcar ug Toledo.

Gawas niini, nikabat sa 34 ka LGUs ang nakasumiter sa ilang report ngadto sa Kapitolyo sa danyos sa ilang mga pananom ug hayopan tungod sa huwaw.

Sa datos nga nahipos sa Kapitolyo adunay 18 ka anay sa baboy ang namatay diha sa mga lungsod sa Asturias, Alcantara, Consolacion, Santander ug Pilar tungod sa heat stroke.

Gawas sa baboy, adunay nangamatay nga kanding, baka ug kabaw tungod sa grabeng kainit.

Gibanabana nga nikabat ngadto sa P390 mil ang danyos sa hayopan. Samtang sa agrikultura, ang lungsod sa Argao nakatala kini og kadaot sa mais samtang sa Lungsod sa Badian nikabat ngadto sa 1.5 ka ektarya ang kadaot sa pananom nga mais.  Samtang ang Lungsod sa Balamban, Dakbayan sa Carcar, Lungsod Tudela ug Compostela nikabat ngadto sa P13.4 milyones ang kadaot sa humay ug uban pang pananom.

Matud ni Rhee Telen, Jr., disaster officer sa PDRRMO nga ang ubang LGUs nagsumiter sa ilang report apan walay gibutang nga kantidad sa danyos.

Adunay mga lungsod nga nihangyo og lugway sa deadline sa pagsumiter og report sanglit nagpadayon pa ang assessment sa mga municipal agriculturist sa ilang lugar.

Subay niini, ang mga lungsod sa Alcantara, Aloguinsan, Badian, Consolacion ug Daanbantayan nikunhod na ang supply sa tubig. Ang PDRRMO nihatag kini hangtud karong adlawa sa LGUs sa pagsumiter sa ilang report nga validated na aron mausa usab tanan ug maila sa Kapitolyo ang mga lugar nga prayoridad nga hatagan og ayuda sa Kapitolyo. (/BDB)(BANAT NEWS)