Bahog-Bahog sa Mactan gipanindot
CEBU, Philippines — Ang aktor sa GMA nga si Derrick Monasterio maoy modala sa Datu Lapu-Lapu ug ang aktor usab sa ABS-CBN nga si Mark Neumann maoy modala sa Ferdinand Magellan sa tinuig nga Bahog-Bahog sa Mactan nga gikatakda karong Abril 27 niining tuiga.
Samtang ang Pinoy Big Brother Teen Edition 4 winner Myrtle Sarrosa mao usab ang mahimong Rayna Bulakna nga kapikas ni Datu Lapu-Lapu atol sa reenactment nga pagahimuon diha sa kabaybayonan sa Mactan.
Ang production director sa nahisgutang Kadaugan sa Mactan karong tuiga nga si Victor Cuenca nagkanayon nga masaksihan sa mga bisita nga motan-aw sa reenactment ang cinematic ug theatrical performance sa maong adlaw sa kasaulogan.
Gibutyag ni Cuenca nga adunay mga prop nga gidugang ilabi na sa paghimo og life size façade sa galleon nga luwanan ni Magellan.
Ang lugar diin ipahigayon ang kalihukan diha sa Liberty Shrine sa Barangay Mactan gilauman usab kini nga mapuno sa daghang mosaksi tungod kay gipalapdan man sa kagamhanan sa maong dakbayan ang lugar.
Nunot niini, magpabilin ang musical presentation sa re-enactment sama sa niaging tuig nga adunay gipuno nga theatrical performance nga magpakita sa kinabuhi ni Datu Lapu-Lapu sa kanhiay nga panahon nga magsugod sukad pa sa iyang pagkabata. Matud ni Cuenca nga ang re-enactment iyang gibanabana nga molanat sa 35 ngadto sa 40 minutos.
“There will be full feelings with a touch of emotions ang acting sa lead cast. To show the love and family values during sa play”, padayag sa artistic director nga si Mark Masa.
Sa pagpadayon sa maong pasundayag ilang hatagan og buhi nga paghulagway ang pagpakita ni Rayna Bulakna nga usa ka “Binukot” princess uban sa pagpakita usab sa rustic ug indigenous materials nga maoy gamiton nga props nga maghulagway sa kinaraang panahon. (/BDB)(BANATNEWS)
- Latest