Sapa sa Bulacao kritikal ang sitwasyon–Homez

CEBU, Philippines – Kritikal na ang sapa sa Barangay Bulacao, Dakbayan sa Talisay gumikan sa pagkakontaminado na niini.

Kini maoy gipahibawo ni Engineer Christine Homez, pangulo sa City Planning and Development Council (CPDC) human nibisita sa siyudad ang mga sakop sa Environmental Management Bureau (EMB).

Si Loreto Rivac, regional coordinator sa EMB nagkanayon nga dili grabe nga alarming ang sitwasyon apan kinahanglan gyud nga mohimo sila og aksiyon aron dili mograbe ang kahugaw sapa.

Nabalaka si Rivac nga kon mapasagdan ang sapa mahimong dako kini og epekto sa katawhan.

Ang sapa sa Bulacao nalakip sa 11 ka sapa sa Sugbo nga kritikal ang kahimtang.

Si Homez nagkanayon nga usa sa nakatampo sa pagkahugaw sa sapa mao ang walay septic tank sa matag panimalay, pataka og labay sa basura ug uban pa nga matang sa paghugaw-hugaw.

Gumikan niini gisabutan sa EMB ug sa Siyudad sa Talisay nga magpahigayon sila sa pagpanglimpiyo sa maong sapa sa sunod semana.

Si Homez nagkanayon nga ilahang patabangon og pagpanglimpiyo ang mga residente sa lugar ug mga stake holder nga nakatampo sa paglabay og hugaw diha sa sapa.

Sa video nga gipakita sa taga EMB makita ang kahugaw sa maong sapa. (/BDB)(BANAT NEWS)