68-anyos gipatay sa manghod

CEBU, Philippines – Patay ang usa ka 68 anyos nga lolo human kini giunay pagpusil sa iyang 61-anyos nga manghod atol sa ilang panaglalis samtang silang duha nag-inom sa Barangay Mulao sa Lungsod sa Liloan.

Ang biktima giila sa kapolisan nga si Anastacio Guc-ong, samtang ang mamumuno mao ang manghod niini nga si Florencio.

Sumala pa ni Police Officer 1 Ginido Glibuena nag-inom ang duha sa dihang nagkalalis silang duha. Giingong giilog ni Florencio ang improvised shot gun ni Anastacio ug gipusil niini sa tiyan nga bahin.

Dali nga gidala sa tambalanan ang biktima apan matud pa nga gideklarar kini didto nga patay na. Samtang, dali nga nadakpan sa kapolisan ang suspetsado nga nagtago didto ra sab sa ilang panimalay.

Matud sa maong polis nga bisan pa man og pamilya ra sila, desidido gihapong mopasaka og kaso ang kabanay nila og kasong murder batok kang Florencio. (/IBM)(BANAT NEWS)