Gipatay nga polis “drug protector?”

CEBU, Philippines – Polis nga gipatay sa Barangay Calajoan sa Lungsod sa Minglanilla gikatahong protektor sa napatay usab nga drug lord sa us aka buybust operation kaniadto diha sa maong lungsod.

Ang hepe sa Regional Intelligence Division nga si Police Senior Supt. Remos Medina mibutyag sa Banat News pinaagi sa phone interview kagahapon miingon nga aduna silay nadawat nga report nga si Police Officer 2 Lord Romyth Cañada maoy protektor sa giingong top 1 nga drug pusher nga si Jovelio  Franza, alias Juvie.

Si Franza napatay sa shootout sa buy bust operation apan napatay usab si PO2 Erve Espina sa Sitio Bacay , Barangay Tulay, Minglanilla niadtong Pebrero 19 ning tuiga.

“May mga barangay officials na nag-report sa kanya na involved sa drugs,” si Medina nagkanayon.

Matud ni Medina wala sa narco-list ni Presidente Rodrigo Duterte si Cañada sanglit walay mitug-an sa mga dinakpan nga siya ilang protektor.

Apan tungod sa maong impormasyon bahin sa maong polis gituohan ni Medina nga adunay kalambigitan sa drugas ang kamatayon ni Cañada.

Ang tigpamaba sa Cebu City Police Office nga si Supt. Janette Rafter mibutyag nga nasuspenso si Cañada human miikyas sa gipahigayong kinalit nga drug test sa Minglanilla Police Station niadtong 2016.

Agosto 2017 miluwat ang order sa iyang pagkasuspenso diin gi-reassign siya sa Regional Personnel Holding and Accounting Unit sulod sa usa ka buwan.

Septiyembre 1 wala na siya gipabalik sa Minglanilla Police Station apan gibalhin siya sa Regional Headquarters Security Group (RHSG) isip usa sa mga base police.

Wala pa mopagawas og pamahayag ang pamilya sa gipatay nga polis bahin sa maong impormasyon gikan sa kapolisan dihang gikuhaan unta sa Banat News. (Gabriel Bonjoc/IBM)(BANAT NEWS)