Lima nigamit og pinong pukot gidakop
CEBU, Philippines — Lima gidakop human nasakpang ilegal nga nangisda sa kadagatan sa Barangay Calmante, Lungsod sa Tudela niadtong Sabado sa gabii.
Alas nuybe sa gabii nasakpan sa Bantay Dagat inubanan sa kapolisan sa Tudela nga ilegal nga nangisda ang managsuong Jomar Otida Arias, 30, Julius Arias, 18, ug Denbert Arias 20; uyoan nga si Prido Otida, 57, ug paryente nga si Eric Echavez Arias ,25.
Ang lima dili mga residente sa maong dapit kay midayo lang sila sa lugar gikan sa Sitio Matnog, Barangay Sta. Cruz, Lungsod sa San Fernando.
Pagpasabot pa ni PO1 Jonard Temperatura nga nakalapas sa ordinansa sa munisipyo sa Tudela ang lima sanglit naggamit sila og pukot nga gidili sa maong dapit.
Wala usab silay permit nga nagtugot nga mamahimo silang mangisda sa maong dapit bisa’g dili sila taga didto.
Ang lima gikatakdang pasakaan og kaso aron pabayron og multa subay sa nalapas nilang ordinansa. (BANAT NEWS)
- Latest
