Bukid sa naga nidahili

CEBU, Philippines – Kapin sa 20 ka panimaye ang natabunan sa pagdahili sa yuta sa Barangay Tinaan ug Naalad sa Siyudad sa Naga kagahapon sa alas 5:30 sa kaadlawon.

Sa pasiunang taho, 14 na ang napalgang patay samtang ubay-ubay pa ang missing.

Alas 6 kagabii gimando ni Police Regional Office-7 Director Debold Sinas ang temporaryong paghunong sa search, rescue and retrieval operations tungod sa zero visibility ug sa safety sa rescuers.

Ang pwersa sa Regional Public Safety Battalion ug ang pwersa sa Cebu Provincial Police Office ang nagseguro sa lugar.

“To help with the recovery and security. Para ma-secure ang lugar kay daghan na kaayo ang tawo nga nitabang ug nanan-aw didto,” matud ni Sinas.

Gimando sab ang forced evacuation ug kadtong dili motuman dakpon sa mga polis nga gipakatap sa lugar.

Ang Provincial Disaster Risk Reduction and Management Office nakatala og kapin 400 ka pamilya ang nibakwit gikan sa Barangay Mainit, Sindulan ug Naalad human sa maong insidente.

Tulo ka evacuation centers ang giila ni Naga City Mayor Kristine Vannesa Chiong nga mao ang Enan Chiong Activity Center (ECAC), covered court sa Apo Cemex ug ang basketball court sa Barangay Naalad.

Apan si Col. Samuel Tadeo, regional director sa Bureau of Fire Protection 7, nagkanayon nga 24-oras ang ilang search and rescue operation. “Walang magpapahinga natin ngayon. Pero make sure nga we are safe,” mando ni Tadeo sa mga rescuers nga gikan sa lain-laing lugar.

Ang Search and Rescue Unit sa BFP-7 nakasinati og kalisud atol sa ilang pagsulod sa usa ka gamay kaayo nga lungag aron makuha ang upat ka tawo diin duha niini ang nakalas ug duha ang buhi.

Matud ni Fire Officer 1 Jacob Cañada nga nigamit gyud siya og pagtakilid sa iyang lawas aron makalusot sa gamay kaayo nga lungag human adunay pamilya nga responsive kaayo. Ang kahumok sa yuta ug padayong naglihok lakip usab ang dili maayong lakat sa panahon maoy nakapalisud sa mga rescuers.

Dili moubos sa 278 ka personnel gikan sa Philippine Coast Guard (PCG) ug Emergency Response Team sa mga silingang lungsod gikan sa Pinamungajan, Dumanjug, Minglanilla, Barili, ug uban pa ang gi-deploy alang sa search and rescue nga gihimo sa maong lugar.

Gipadala sab sa kagamhanan sa Dakbayan sa Mandaue ang 24 ka personnel sa City Disaster Risk Reduction and Management Office sa Barangay Tinaan, Dakbayan sa Naga diin nahitabo ang kalit nga pagdahili sa yuta.

Si Mayor Gabriel Luis “Luigi” Quisumbing nimando sa pagpadala sa mga medical equipment ug duha ka ambulansiya.

Samtang ang City Social Welfare Office usab ang nagpadala sa duha nila ka mobile kitchen nga magamit sa mga apektadong pamilya.

Si Cleo Dabon sa command center nga nahinabi sa Banat News niingon nga alas 8:53 kagahapon sa buntag ilang gipadala ang unang hugna sa mga personnel sa CDRRMO ug gisundan kini alas 2:22 kagahapon sa hapon.

Si Naalad Barangay Kapitan Teodoro Cantal Jr. nitug-an nga wala silay igong pundo sa barangay hinungdan nga mag-agad sila sa mga opisyal sa siyudad sa ayuda nga ihatag sa mga biktima.

Matud ni Gobernador Hilario Davide III nga kun unsa man nga ayuda nga gikinahanglan iyang gipaandam alang sa mga naapektuhan.

Nipadala na og relief goods ang Kapitolyo ngadto sa biktima.

Si kanhi mayor Valdemar Chiong nitug-an nga unang higayon ang nahitabong trahedya hinungdan nga awhag niya sa katawhan nga iampo ang tanan nga mga nakalas, naangol, pamilya ug mga responder.

Iyang gipasabot nga sa unang panahon housing area ang maong lugar sa mga kawani sa Apo Cemex ug wala usab sila nagmakulang sa pagpahimangno kanunay sa mga residente.

Samtang nakasinati una og paglinog ang mga residente dayon gisundan sa pagdahili sa yuta.

Matud ni Paz Capoy, 49, nga tulo gyud sa iyang anak ang natabunan human nidahunog ang yuta sa kabukiran.

Wala na siya’y laing nabuhat kun dili ang pagminatay og hilak samtang gipangwaling ang mga yuta ug bato.

“Wala na gyud koy nabuhat. Akong mga anak natulog pa,” asoy pa ni Capoy nga nagbakho.

Matud ni Christita Villarba, usa sa mga nakalingkawas sa trahedya kuyog sa iyang pamilya, nga nakasinati sila una og linog ug pipila ka gutlo nakadungog sila og pagdahunog ug ang pag-aso sa lugar.

Samtang si Analyn Pansoy, usa sa mga residente nga nakalingkawas lakip ang pamilya apan gipangita pa ang inahan, nitug-an nga kusog nga pagdahunog ilang nadungog ug pipila ka gutlo ang singgit sa mga tawo hinungdan sila nanggawas sa ilang gipuy-an. (Rowena D. Capistrano, Camille L.Pateres, Romeo T. Limpangog ug Le Phyllis F. antojado/GMR)(BANAT NEWS)