Tulo patay sa aksidente sa karsada

CEBU, Philippines — Duha ang namatay ug upat ang grabeng naangol sa panagbangga sa duha ka motorsiklo nga giluwanan og tag-tulo ka tawo sa national road, Sitio Roxas, Tabunok, Lungsod sa Tabuelan alas 9 pasado sa niaging gabii.

Si Police Senior Inspector Emmanuel Rabaya, hepe sa Tabuelan Police Station, niila sa duha ka drayber sa motorsiklo nga namatay nga pulos walay helmet nga sila si Mark Palao Jr., 23, taga Barangay Tabunok ug Celestino Orcullo, 19, tinun-an sa high school nga taga Barangay Poblacion sa maong lungsod.

Matud ni Rabaya nga ang gimaneho ni Palao nga itom nga XRM nga motorsiklo ang giangkasan nilang Nepolito Guanzon, 32, ug Arselino Maglinte, 35, pulos taga Barangay Olivo sa maong lungsod.

Ang pula nga XRM nga motorsiklo nga gimaneho ni Orcullo ang giangkasan sab nilang Crystal Mae Mahinay, 18, pulos taga Barangay Tabunok ug usa ka 17-anyos nga babaye.

Sumala pa sa assistant traffic investigator nga si Police Officer 2 Ver Hortelano nga paingon na unta mouli gikan sa Barangay Poblacion si Palao ug duha ka angkas.

Sila si Orcullo ug duha ka kauban nga babaye ang padulong sa Poblacion kay maghimo sa assignments.

Apan giingong nikawat sa pikas linya si Orcullo maong nagkabangga sila.

Gituohang nakainom si Orcullo gikan sa piyesta samtang nakuha sab sa U-box sa motor ang ilimnon nga makahubog.

“Blind curve na diha unya nisamot pa gyud kagamay ang dalan kay naa may gitrabaho nga road widening sa lugar. Kompleto man unta og signages diha. Naa say mga suga,” matud ni Hortelano.

Si Rabaya niingon nga tungod sa kusog nga pagkabangga, ang mga sakay sa duha ka motorsiklo ang nanglupad nga maoy nakaingon sa grabeng pagkaangol.

Dali nga gidala sa Tuburan District Hospital ang unom ka biktima apan sila si Orcullo ug Palao ang gideklarar nga dead on arrival.

Ang upat ka mga angkas ang gibalhin sa Vicente Sotto Memorial Medical Center sa Dakbayan sa Sugbo tungod sa grabe nga kahimtang.

Nalatayan

Sa laing bahin, motorista patay human nalatayi sa nagsunod nga van-for-hire (V-Hire) sa Tayud, Consolacion niadtong Domingo sa hapon.

Ang nakalas giila sa kapolisan nga si Edwin Estoconing, taga Yati, Liloan samtang ang nagmaneho sa V-Hire mao si Rolito Andrin Ponce, 53, taga Dakbayan sa Danao.

Sumala pa sa inisyal nga imbestigasyon ni Senior Police Officer 1 Alden Abayabay, traffic investigator, nga paingon sa Dakbayan sa Mandaue si Estoconing dihang nawagtangan kini og kontrol ug nahagba sa kalsada.

Giingong wala nakabantay dayon ang nagsunod nga si Ponce ug nalatayan si Estoconing. Gidala pa sa tambalanan ang biktima apan gideklarar nga dead on arrival.

Kasong reckless imprudence resulting to homicide ang atubangon ni Ponce. (BANAT NEWS)