Nagdinunggabay parehong patay

CEBU, Philippines — Patay ang duha ka lalaki nga pulos hubog human sila nagdinunggabay  diha sa Barangay Lawaan, lungsod sa Dumanjug niadtong Biyernes sa tungang gabii.

Ang nakalas giila nga sila si Benvinido Cinco, 55, lumad sa maong lugar ug si Melchor Abellana, 57, nga taga Perrelos, Siyudad sa Carcar.

Matud pa ni Police Officer 1 Marlou Sentillas, imbestigador sa maong kaso nga sa sayo pa parehong nangahubog ang duha ug nagkasinumbagay.

Si Sentillas midugang nga si Cinco, usa ka habal-habal driver ilado na sa maong lugar nga mangita og bikil kung kini mahubog, samtang si Abellana dayo lang sa maong lugar kay nagtrabaho kini isip construction worker.

Giingong nagkalalis ang duha hinungdan nga sila nagkasinumbagay apan nauwang.

Si Cinco nisumbong sa ilang kapitan ug gimandoan sila nga husayon sila sa barangay kagahapon unta sa buntag.

Apan matud ni Sentillas wala makapaabot si Cinco og buntag ug nipauli kini sa ilahang pinuy-anan ug mikuha og kutsilyo kay gusto gyud mobawos.

Matud pa nga giatangan ni Cinco si Abellana ug sa dihang nigawas kini kay  mopalit og ilimnon giduol kini ug gidunggab sa tiyan.

Matud ni Sentillas si Abellana nakadagan pasulod sa tindahan apan gigukod kini ni Cinco ug didto nakabawos kini kay gihapsan niini og botelya ang nawong ni Cinco. Nailog usab niya ang kutsilyo ug gihansak kini ngadto sa dughan ni Cinco.

Ang duha patay na pareho pag-abot sa tambalanan. (/IBM)(BANATNEWS)