P1.8M marijuana gilarot didto sa Danao
CEBU, Philippines — Mokabat sa P.8 milyon nga balor sa marijuana ug ginadili nga drugas ang nasakmit sa kapulisan sa Danao City sa ilang sunod-sunod nga operasyon niadtong Sabado sa buntag hangtod sa gabii sa mga barangay sa Lawaan, Cagat-Lamac, Maslog, ug Suba.
Pinaagi sa usa ka wa nagpailang informant, ang Drug Enforcement Unit (DEU) sa Danao Police milarot sa dili muminos 8,000 ka punoan sa Marijuana sa Barangay Lawaan.
Giila ni Police Superintendent Jaime Quiocho Jr., hepe sa Danao Police ang nagtanom niini nga mao si Ricardo Bacang kinsa wala nila maabti sa lugar.
“Naka-sense siguro na paparating ang ating police at agad tumakas pero kakasuhan natin siya,” si Quiocho miingon.
Ang mga nalarot nga marijuana gisunog dayon didto sa dapit ug nikuha lang sila og gamitong ebidensiya.
Sa laing operasyon, unom ang nasikop sa gipahigayon nga buy-bust operation nga giila nga sila si Rene Caputi, Eleno Laurito, Marjorie Ermita, Francisco Colon, Romeo Batucan ug Sandy Palma.
Nasakmit sa mga suspetsado ang duha ka medium nga pakete, 20 ka gagmay nga pakete sa gituohang shabu nga mubalor og hapit P200,000 ug usa ka kalibre .45 nga adunay mga bala. (BANAT NEWS)
- Latest
