Zafra di na modagan pagka ABC

CEBU, Philippines – Nakadesisyon si incumbent Association of Barangay Council (ABC) President ug Tisa Barangay Captain Phillip Zafra nga dili modagan pag-usab sa umaabot nga ABC elections karong Hulyo 30  kay gusto niya tutokan ang iyang barangay.

“Ever since two or three years ago I already made a decision not to seek reelection so I’m not seeking reelection as ABC President because I made a covenant with our constituents in Tisa to concentrate in our barangay,” asoy ni Zafra.

Giangkon ni Zafra nga outnumbered gyud sila sa gidaghanon. Matud niya importante gyud nga ang ABC isip asosasyon mobarog ug motingog alang sa kabarangayan.

Napahibawo na ni Zafra ang mga kaalyado mga kapitan atol sa ilang lunch meeting sa miaging adlaw ug sigon niya gusto matud pa sa mga kaubang kapitan nga modagan siya og usab apan tungod kay dehado gyud sila sa numero maong mosibog siya.

Gawas kang Zafra, laing mga ngalan nga mitumaw alang sa umaabot nga ABC Election mao sila Mabolo Barangay Captain Niña Mabatid ug Kasambagan Barangay Captain Franklyn Ong.

Wala hinoon gibutyag ni Zafra kon si kinsa sa duha ang suportahan niini apan iyang giangkon nga naa na siya’y napilian, apan siya miklaro nga  independente siya kay ‘non-partisan’ gyud unta ang barangay.

“As I’ve said under the Local Government Code being a barangay Captain we are supposed to be apolitical. They may identify me or not that’s fine with me. Unlike man gud karon, you are so called ‘identified’ and they are instrumental of course in putting you there you really have sometimes draw the line, for this I really have to stand on my own and I’m happy pero wa mag-ingon nga nag-control na sila nako ha, you have to consider man gud, this time when you are no longer there mas wider na imong perspective, wider na imong views,” pasabot ni Zafra.

Si Vice Mayor Edgardo Labella miasoy nga andam siya mosuporta kon si kinsa nila ni Zafra ug Mabatid ang modagan pagka-ABC President.

Una nang mipadayag og suporta ang kapitan sa barangay sa Mambaling nga si Gines Abellana kang Mabatid kon modagan kini sa ABC.

Si Mayor Tomas Osmeña nangutana kang Abellana kon pila ang gibayad ni Mabatid kaniya apan si Abellana miingon nga walay kwarta nga nalambigit sa iyang pagbiya sa partido ni Osmeña. Ang iyang rason, wala siya pahibaw-a sa mayor nga butangan og Barangay Mayor’s Office ang Mambaling ug wala usab mohimo og konsultasyon ang mayor kon kinsa ang padaganon sa ABC.

Matud niya dunay mga kapitan nga mas gustong mosuporta kang Mabatid apan di niya buot pangalanan. (/IBM)(BANAT NEWS)