Mabatid nakakuha og suporta
CEBU, Philippines — Usa ka kapitan nga kaalyado sa Bando Osmeña Pundok-Kauswagan nideklarar nga mosuporta kang Mabolo Barangay Kapitan Niña Mabatid alang sa pagka-presidente sa Association of Barangay Councils.
Matud ni Mambaling Barangay Kapitan Gines Abellana nga siya ug pipila ka kapitan sa kabarangayan wala makagusto nga si Mayor Tomas Osmeña ang magbuot kun kinsa ang padaganon sa ABC.
Si Abellana nga usa ka abogado niingon nga ang nindot unta mao nga konsultahon sa mayor ang mga kapitan kun kinsa ang gusto.
Gituboy ni Osmeña mao si Kasambagan Barangay Kapitan Franklyn Ong atbang sa kasamtangang naglingkod nga si Tisa Barangay Kapitan Phillip Zafra. Nagtuo si Abellana nga haum si Mabatid nga mahimong presidente sa ABC.
Apan si Osmeña nakapangutana kun pila ang gibayad ni Mabatid kang Abellana ug iyang giklaro nga dili kini kaalyado sa BOPK kay ang ilang kandidato napilde.
Si Mabatid masaligon nga makakuha og botos gikan sa mga kapitan apan si Osmeña niingon nga kadtong mga kapitan sa BOPK nga mosuporta kaniya dili niya ilhon nga sakop sa partido. (GMR) (BANAT NEWS)
- Latest
