Trapik sa San Fernando sa lunes

CEBU, Philippines – Nihimo ang kagamhanan sa Lungsod sa San Fernando og traffic management plan atol sa adlaw sa eleksiyon ug sa ilang piyesta.

Matud ni Jonathan Tumulak, focal person sa traffic management sa Kapitolyo, nga kini aron paglikay sa posibleng masinating grabeng trapik sa maong mga adlaw.

Gawas sa mga tawo nga mobotar sa eleksiyon, sumala pa ni Tumulak nga adunay prosesyon sa kapistahan sa lungsod ug gipaabot nga makamugna og huot sa dagan sa mga sakyanan nga moagi padulong ug gikan sa habagatang bahin sa probinsiya.

Matud ni JL Taping, traffic manager sa San Fernando, nga tibuok adlaw gyud masinati ang trapik karong Lunes.

Sumala pa niya nga mahuman ang botasyon sa alas 3 sa hapon apan ang ihap sa balota hayan maabtan pa sa alas 10 sa gabii samtang ang prosesyon sugdan alas 6 sa gabii.

Iyang giklaro nga ang alternate route sa lungsod mao sab ang rota sa prosesyon nga molanat sa duha ka oras nga moagi sa merkado publiko, sports complex labang sa national highway balik sa simbahan.

Ang mga sakyanan gikan sa habagatan moagi sa Barangay North Poblacion dayon agi sa kilid sa simbahan samtang ang gikan sa amihanan moagi sa XYZ St. padulong sa merkado publiko paingon sa luyo sa sports complex balik sa national highway.

Gipahibawo ni Taping nga ang re-routing plan alang lang sa mga light vehicles ug dili pwede sa mga dagku nga trak sama sa bus tungod kay gamay lang ang karsada.

Nagkanayon si Ricardo Reluya, chief of operation of Local Disaster Risk Reduction and Management Office sa San Fernando, nga walay closure sa national road atol sa piyesta.

Matud ni Dennis Chong sa Provincial Disaster Risk Reduction and Management Office nga ilang abagan ang Lungsod sa San Fernando pinaagi sa pagbahin sa ilang mga sakop alang sa traffic, public safety ug emergency response. (Flaire Bayalas, CNU Interns/GMR)(BANAT NEWS)