Imbestigasyon pagpangrakrak nalangan

CEBU, Philippines — Wala karon sa nasud si Wellington Lim, ang giingong sakay sa bullet-proof Ford Expedition nga girakrakan sa mga armadong lalaki diha sa Archbishop Reyes Avenue ning dakbayan pipila ka adlaw na ang nakalabay.

Mao kini ang gibutyag sa tigpamaba sa igsuon niining si Peter Lim. Si  Dioscoro Fuentes Jr., tigpamaba ni Peter Lim, mibutyag sa Banat News nga wala sa nasud si Wellington.

“Ang family kay moadto man na sa gawas sila every Holy Week. I cannot confirm or deny it,” si Fuentes miingon.

Kahinumdoman nga si Fuentes maoy mibutyag sa media nga si Wellington maoy sakay sa Ford Expedition nga girakrakan og mga armadong grupo.

Wa ra maunsa si Wellington apan napagan ug napatay ang gwardiya sa ilang bar nga si William Bucay ug naangol ang kaubang gwardya nga si George Lambating ug duha ka turistang Germans nga silang Pauline Basbach ug Manuel Goerrings.

Giangkon karon sa kapolisan nga naglisod gyud sila sa ilang imbestigasyon sa pagpangrakrak sa sakyanan sa nagpailang biktima nga si Wellington Lim, ang igsuon sa kontrobersyal nga negosyanteng si Peter Lim nga gipasanginlang nalambigit sa illegal drug trade sa Visayas.

Ang hepe sa Cebu City Police Office Investigation Detection and Management Branch nga si Supt. Ryan Devaras mihulagway nga ‘unique’ ang maong kaso kay ang biktima wala gyud modangop kanila.

Hangtud karon wa pa nila masusi ang sakyanan nga girakrakan kay way mibutho nga tag-iya. (IBM) (BANAT NEWS)