Tulo ‘nanulong’ gipamusil patay
Ang mga biktima giila nga sila si Joel Bingcola, 37, taga Barangay Liki, Balamban; Mario Caminos, 60, ug si Emilio Pardillo, 44, pulos taga Barangay Hingatmonan sa maong lungsod. File
CEBU, Philippines — Gipamusil patay ang tulo ka lalaki human giingong nanulong sa Barangay Biasong, Balamban niadtong Sabado sa hapon.
Ang mga biktima giila nga sila si Joel Bingcola, 37, taga Barangay Liki, Balamban; Mario Caminos, 60, ug si Emilio Pardillo, 44, pulos taga Barangay Hingatmonan sa maong lungsod.
Sigun pa sa imbestigador sa kaso, PO3 Emmanuel Blones, nga dako ang posibilidad nga nisulong ang mga biktima sa panimalay sa suspek nga si Roel Cordiñera, 34, sa Barangay Biasong nga gibana-banang tres kilometros ang gilay-on gikan sa gipuy-an sa mga biktima.
Gidakop sab ang tulo ka kabanay ni Roel nga sila si Reynaldo Cordiñera Jr., 29; Reynaldo Sr., 60, ug ang ig-agaw ni Roel nga si Julifer Tundag, 30, human sila naabti sa kapolisan sa lugar sa krimen.
Gituohang pag-abot sa mga biktima sa balay sa mga Cordiñera gipamusil ang tulo ug nakaangkon og grabeng samad pinusilan sa ulo ug dughan.
Atol sa pagresponde sa kapolisan, naabtan nga mga armado sab og mga granada, home-made shotgun, KG9 ug kalibre .45 ug usa ka karaang pusil ang mga biktima.
Niining pagsuwat, wala pa nasuta sa kapolisan ang motibo luyo sa maong krimen.
Kasong multiple murder ang atubangon ni Roel samtang ang tulo ka kabanay niini kinsa gitumbok nga kakunsabo ang ipailawom pa og paraffin test aron masuta kon may partisipasyon ba sa krimen.— Ermida Q. Moradas (FREEMAN)
- Latest
