Esgana sad-an sa “Pagka-arogante”

CEBU, Philippines - Gibasura sa buhatan sa Ombudsman ang motion for reconsideration nga gisang-at ni Sta. Fe Mayor Jose Esgana sa pagsuspenso kaniya og tulo ka buwan nunot sa iyang paghinambog ngadto sa duha ka tripolante sa barko.

Matud ni Graft Investigation and Prosecution Officer III Maria Corazon Vergara-Naraja nga wala’y bag-ong ebidensiya nga gipresentar si Esgana aron mausab ang unang desisyon.

Gipatuman sa Department of Interior and Local Government ang kamanduan niadtong Oktubre 18, 2016 ug naserbisyuhan na ni Esgana ang suspensiyon sa wala pa naresolbar ang iyang mosyon nga gibabagan sab sa mga reklamante.

Nahitabo ang insidente atol sa pagsakay ni Esgana sa LCT Island II nga iya sa Island Shipping Lines niadtong Hunyo 4 ug Hunyo 9, 2015 gikan sa pantalan sa Sta. Fe.

Ang reklamante nga sila si Rodolfo Solidor ug Carl Martin Absalon, mga sea marshals nga gitahasan sa pagsusi sa tiket sa mga pasahero ug bill sa mga kargamento.

Ang duha nipasangil nga nag-inisog si Esgana dihang ilang gipangayoan sa tiket.

Sa iyang tubag si Esgana niangkon sa pasangil ug gidasonan kini sa mga testigos nga sila si Lucresito Labores ug Denmar Pacinio.

Apan sa iyang motion for reconsideration, si Esgana niingon nga dili mao ang nalatid sa iyang counter-affidavit ug iyang gibasol ang iyang abogado nga naghimo niini.

Matud ni Naraja nga dili na mabakwi ang pamahayag ni Esgana ug mao na kini ang       nalatid sa iyang counter-affidavit.

Wala na sab hatagi og bili sa Ombudsman ang pasangil ni Esgana nga si Alex Tan, ang tag-iya sa barko, nga maoy nagmaneho sa kaso.

Niadtong Abril si Esgana nakig-away sa kura paruko sa ilang lungsod nga si Fr. Roy Bucag nunot sa isyu sa kalingawan atol sa Semana Santa.

Bag-ohay lang si Esgana nakasugat na sab og away tali ni Cebu City Mayor Tomas Osmeña kinsa iyang gipasanginlan nga nanghulga kaniya kuyog si Tan. (BANAT NEWS)